دیوانه دیسونلر

قوی عشقیمه خاطر منه دیوانه دیسونلر

هجران چکوب از بس گلوب افغانه دیسونلر

قورخوم بودی آوازه ی عشقیم قاناد آچسون

دنیانی سونلر اونا افسانه دیسونلر

تک بیر باخیشون مست ایلیوب کل جهانی

بیر جرعه می ایشدور منه مستانه دیسونلر

سال بوینوما اول طره ی شبرنگی نگاریم

زلفونله چکوبسن منی زندانه دیسونلر

قان آغلارام ، حسرت چکرم صبح مساده

هجرونده دونوبدور اورگیم قانه دیسونلر

آخر نقدر هجر اوتونا یانمالیام من

تا که منی اوز شمعیوه پروانه دیسونلر

جان نقدینی جانانیمه قربان ایدرم من

تا عشقیمی بو عالم امکانه دیسونلر

مینلر خم می بیر یانا ، بیر شهد کلامون

ایلوبدی منی راهی میخانه دیسونلر

مجنون صفت هر یاندا آدون ورد زبانیم

قوی پیر خراباتیله هم خانه دیسونلر

سن سیز نیه لازم بیله عالم بیله دوران

واللهی گرکدور بورا ویرانه دیسونلر

بیر عمردی من چاه فراقوندا اسیرم

بو سرّی گرک یوسف کنعانه دیسونلر

بیماریوم ای دلبریم احسان ایله قویما

جاندان ال اوزوب چاتمادی درمانه دیسونلر

"ناکام" ال اوزوب دار فنادن بولوسن سن

تا اهل زمانه اونا بیگانه دیسونلر